جمال وطبيعة بلجيكا المملكة الأوروبية
- تاريخ النشر: الإثنين، 29 يناير 2018 | آخر تحديث: الثلاثاء، 30 يناير 2018
مشاركة من مسافرون بلا حدود Laith Battikhi
- مقالات ذات صلة
- استكشف جمال الطبيعة في المغرب
- السياحة في بلجيكا
- جولة في المحميات الطبيعية في المملكة العربية السعودية
أولاً بلجيكا من البلاد إللي تفاجأت بحلاوتها... أكيد بدها شينغين للجواز الأردني... ومافي إلها طيران مباشر من الأردن... كنت دائماً أروحها عن طريق أمستردام هولندا عالملكيه... ومن هناك في أكيد قطارات بس أنا بفضل السياره... التذكره كلفتني 600 دينار مش رخيصه بعرف... بس أكيد في تذاكر أرخص... من أمستردام لمعظم مدن بلجيكا المستاهله بدها من ساعتين لتلاته... ممكن أربعه إذا حبيت تصف عاليمين كل شوي وتلطم وتبكي عالمناظر الحلوه
ثانياً الواضح جدا إنه بلجيكا تعتبر من أشهر البلاد في صناعة الشوكولاته... يعني إللي بده ينحف ما يروح هناك أكيد... بين كل محل شوكولاتة ومحل شوكولاتة في محل شوكولاتة... أشكال وألوان... وطريقة العرض فيها إبداع عالي... تعتبر الدوله رقم واحد في تصدير الشوكولاته بالعالم َوبتنتج بالسنه فوق ال200 ألف طن شوكولاتة... ببيعوا أكتر من بسكوت كناري وراس العبد مجتمعين... من أشهر محلاتهم نيوهاوس وجودايفا NEUHAUS... GODIVA
ثالثاً بلجيكا وهولندا ولوكسمبورغ ممكن ينعملوا بنفس الرحله لقربهم من بعض من ناحية المسافه ومن ناحية السهوله... لا في حدود ولا في ختم جوازات ولا تصف عالدور... ولا بسألوك كم كيلو لحمه مهرب معك... بحكوا فيها هولندي أو فلمنكي وبحكوا فرنسي وعدد قليل بحكي ألماني... عدد سكانهم فوق ال10 مليون... مليون ونص منهم من الناس إللي هاجروا لبلجيكا ومن أصول ومنابت أخرى ... بيوتهم جميله جداً... وإلها طابع مميز... وطبعاً بلجيكا مملكه
رابعاً غير الشوكولاته... بلجيكا كتير مشهوره بالوافل والبطاطا... عملتهم اليورو وهي من دول الشينغين... عاصمتها بروكسل إللي فيها مقر الناتو والإتحاد الأوروبي... فيها جاليه كبيره من العرب وخصوصاً من المغرب العربي... أجمل مكان فيها هو منطقة السوق الكبير أو GRAND PLACE... وهو السكوير الرئيسي... في مبنى البلديه... ومليان مطاعم ومحلات... وعادة بيعملوا فيه نشاطات مختلفه من حفلات وغيرها... بشهر تمانيه كل سنتين بغطوا الأرض فيه بسجاده من الورود والمنظر حلو لو إنزار المكان بالليل أو بالنهار
خامساً قريب من هادا المكان وجاي على زاويه في تمثال صغير لولد صغير الظاهر كان محشور ودبر حاله... على شكل نافورة... إسمه MANNEKEN PIS وهاد يعتبر من أهم معالم العاصمه بروكسل